تعريف بالكاتب
أنا والعياذ بالله من أنا أفشل قلم في عالم المدونــات
فقر دم الإحساس يلازمني منذ ان كنت طفــلا
في حصة الفنية بالمدرسة عمري ماقد رسمت إلا نفس المنظر
"جبال وفيه نهر شاق من بينهن"
قلت ابصير شاعر : رحت للبّر حول بنبان حيث قِيل لي إنه فيه جن هناك وإنه يسمع اصوات طق بالليل
صارخت مثل المهبول أبي جنية تعشقن وتصير هاجسي اللتي تلقنني الشعر لكن تعذر الإتصال بالصفحة
قلت لن ايأس .. أبتعلم التصميم وبأبحر في محيط الفوتوشب والصور …..النتيجة : لاتحــاول مير .. دور لك شي ثاني
قلت ياولد .. أكيد فيه طريقة أقدر اعبر فيها عن احاسيسي المخمجّة … وش اسوي … لمع مصباح كلمة الموسيقة في مخي
شريــت فلوت "ناي" .. والحين شفه محطوط جراب لأحد السكاريب
وشلون بأتزوج وأنا منزوع الإحساس ..مالي إلا مدونة مالها هدف محدد
مدونة لصمقة ومطرسة وحوقان وخبط عشواء … كركبــة يعني
وهذي فكـرة عذراء لأن كل اصحاب المدونات مسوين مدوناتهم لأهداف معينة اغلبهم بنات إلا من رحم ربي .. ولا تصاميم ولا خواطر
ماعمري شفت أحد مسوي مدونة مالها هدف كمدونتي
ولذلك أقدر اقول بكل فخر إن إحساسي أثمر أخيرا وأنجب فكرة عذراء من بنات أفكاري … وعليهفإنني سأكافيء نفسي بزوجة مسيار وهالمدونة راخ تكون البروكسي الذي بيوصلها لي
كذلك قررت إني أكون إنسان وحيد مثل روبرت دينيرو في فلم هيت وشعاره
لاترتبط بشي ممكن يستغرق منك أكثر من 30 ثانية تفكير لكي تتركه
فليس عندي اصدقاء , ولا أخوياء … وتوضح لي مع مرور الناصرية والزمن إنها هذي هي صيحة جديدة من صيحات الموضة في بلاد قريت اسمها بس نسيتها
ابي اصير مثل السيد كريسفورد
كريسفورد , لندن, جار لمدرسة البنات الداخلية السابعة
نظرتي لمستقبلي أشوف نفسي اذا دخلت الأربعينات وقربت من سن البأس تماما كالسيد كريسفورد .. اعزب , وسيم . وصاحب أكبر مناجم الماس في العالم.. وعندي خادم هندي حق الشيشة
هذا تفكيري ومعجبني والي موب عاجبه كلامي بسلامته .. والي عاجبه برضو بسلامته
لانيب متكلم عن وظيفتي ولا دراستي ولا عمري ولا شيء من حركات المريضين الي يسوون فيها راقين ومتحضرين وتلقاهم اذا مر الواحد من عند حادث ضرب البريك .. وقف بقارعة الطريق
إلتفت كالسلقة وقعد يناظر أجواء الحادث ويحلل ويقرر ويصرّح
والنتيجة ضياق الشارع و سببو "الزحمة" وكله لأن التحضّر الموجود لربعنا لايظهر إلا على ورق الإمتحان… حاله حال الي يتعلمه السعودي .. مايقدر يُُطلعه إلا على ورقة إمتحان أو بإستدعاء شفوي ك"سؤال" المُمتحن له.
أما إنه يظهر كظاهره طبيعية او فينومينا من تلقاء او بقناعته ولا يقصد ان يبهر فتاة عشان يرقمهــا .. طبيعي طبيعي يعني مافيه كيماوي فإغسل موترك من هالفكرة
